10 сакавіка раённы агляд-конкурс аматарскіх аб’яднанняў “Свет захапленняў” завітаў у Поразава. Журы і гасцей чакала тэатралізаваная гульнёвая праграма. А падрыхтаваў яе дзіцячы клуб «Вясёлы балаган» Поразаўскага ГДК. Сюжэт гульні адпавядаў сучаснасці. Як вядома, 2011-ы названы Годам прадпрымальнасці, вось і гаспадары падвор’я Віктар Ганчарэвіч і Марта Быб вырашылі адкрыць свой асабісты пансіянат. Як кажуць, і грошай зарабіць, і здароўе наведвальнікаў палепшыць. Назва пансіяната гаварыла сама за сябе – “Абы здароўе”. Удзельнікам давялося і бульбу на палетках збіраць, і есці смачныя блінцы. І пачалося. Гаспадарам удалося правесці вясёлыя і адначасова аздараўляльныя конкурсы. Я таксама прыняла ўдзел у гэтай гульні і атрымала салодкі пачастунак.

Свята доўжылася паўгадзіны, але нават за гэты кароткі адрэзак часу мы цалкам акунуліся ў вясковыя турботы і былі акружаны гасціннасцю і цеплынёй гаспадароў. Журы, а імі былі метадыст дасуговай дзейнасці РМЦ А. І. Адашчык і вядучы метадыст аматарскіх аб’яднанняў РМЦ С. П. Дзянісава, праведзенай рабоце і падрыхтоўцы да агляду далі станоўчую адзнаку.

Аматарскае аб’яднанне Поразаўскага гарадскога Дома культуры – дзіцячы клуб аматараў гульні “Вясёлы балаган” – было сфарміравана ў 2002 годзе і налічвае ў сабе 13 удзельнікаў. Кожны з іх таленавіты і выдатны па-свойму. Кіраўнік аматарскага аб’яднання Людміла Мікалаеўна Ботвіч да кожнага знайшла асабісты падыход. У 2008 годзе клуб гульні быў узнагароджаны дыпломам “За развіццё аматарскай творчасці ў арганізацыі вольнага часу дзяцей і моладзі”, а таксама неаднаразова адзначаны на абласных і раённых аглядах аматарскіх аб’яднанняў.

К. ТОТЧЫК,

студэнтка філалагічнага факультэта ГрДзУ імя Янкі Купалы, спецыяльнасць «Журналістыка».